Rikthehet me një bashkëpunim shqiptar

TIRANË, 18 Shkurt /ATSH- Edmond Prifti/.-Këngët e tij i janë kushtuar paqes e besimit, apo miqve, të tanishëm por edhe  atyre që nuk jetojnë më. Ato kanë qenë hiti i rinisë së viteve ’96, kur Nana publikoi hitin e parë “Darkman” e një vit më pas “Lonley”, këngë, e cila u ngjit shumë shpejt në hitet e klasifikimeve botërore.

Jeta e tij, bashkëpunimet, publiku apo  shqiptarët, e deri tek “zhdukja” e tij një kohë të gjatë nga tregu muzikor botëror, ishin tema e bisedës që ATSH zhvilloi pothuajse dy orë para koncertit të tij që u mbajt në “Dream City”, në mesnatën e së shtunë, para mijëra adhuruesve shqiptarë. (Kliko këtu për videon)

Nana, njihet befas teksa hyn në hollin e “Sky Hotel” në qendër të Tiranës. Dy balerinat e tij hyjnë  bashkë me menaxhen e tij Sina Taylor, e cila edhe siguroi  intervistën për ATSH.  Nana  të jep dorën e të pyet për Agjencinë ku punon. Ka mbetur po ai këngëtar që për shumë të rinj të asaj kohe ishte idhulli i muzikës rap apo euro-rap, siç u quajt dikur.

Teksa e falënderojmë për intervistën e tij ekskluzive , Nana thotë: “Ecim sipas kohës gjermane. Me Sinën(menaxherja),  bashkëpunojmë prej kohësh. Nuk e kam kot këtë vajzë të këndshme pranë meje”. E tinëz e pyesim për paqartësinë që ekziston në internet rreth emrit të tij, Nana apo Darkman (sipas këngës me të njëjtin titull)… Duke qeshur ai shpjegon se “Si të dëshironi ju. Emri im, pra, atë që më kanë vënë prindërit është Nana, çka në gjuhën ganeze nga është edhe origjina ime, do të thotë mbreti, por në muzikë më njohin edhe me Darkman apo Njeriu i Zi, i cili u bë edhe pseudonimi im më pas. Mbase shkurt, kanë dashur të bëhem, Mbreti i Repit”.

E ndërsa e pyesim se cila është kënga e tij e preferuar në gjithë karrierën e tij, Nana përgjigjet se është tejet e vështirë t’ua them, “por me një përjashtim të vogël them se është “All good males” nga albumi im i ri”.
Dikur dhe sot, Nana
Gjate intervistes me kengetarin Nana. Foto e realizuar nga manaxherja e kengetarit, Sina Taylor/ATSH

Gjate intervistes me kengetarin Nana. Foto e realizuar nga manaxherja e kengetarit, Sina Taylor/ATSH

Le të flasim për fillimet tuaja në muzikë…por pyetja e parë që mund të bënte çdokush që ka ndjekur aktivitetin tuaj ndër vite, do te ishte, ku ka qenë Nana gjithë këto vite, pas sukseseve të mëdha ndërkombëtare që ju patët me “Darkman”, “Lonley”, “Dreams”, “He’s comin’”, “One second”, “Remember the time”, e shumë hite të tjera. “E di dhe ju kuptoj”, vijon Nana në intervistën e tij ekskluzive për ATSH-në, duke thënë se “ ndjeja mungesën e publikut, e atyre njerëzve që kanë dashur muzikën time. Duket sikur u zhduka në se mund të them kështu, por diçka ndryshoi me mua pas sukseseve të para. Për më tepër biznesi muzikor ndryshoi krejt, pasi doli interneti në modë midis viteve 2000-2001, e njëherazi njerëzit ndaluan së bleri kaseta dhe CD. Pra biznesi muzikor ndryshoi  e jo veçse për mua. Nisa të vizitoj botën mbarë, duke u argëtuar dhe duke i dhënë kohë vetes të bëja diçka krejt ndryshe. Por ndërkohë punoja për EMI Music dhe Universal në Gjermani, duke qenë i pranishëm pas skenave e direkt pas produksioneve muzikore. Ndërkohë, nuk i kam lënë pushimet e mia në Japoni, Itali, Spanjë madje edhe në Rumani, ku kam kujtime tejet të bukura nga ai vend…”.

Pra në një retrospektivë, doni të thoni që u larguat nga publiku, pasi skena e suksesi i atëhershëm ju lodhi? Këtë doni të thoni? “Hmmm kur je tejet i suksesshëm e kur njerëzit të njohin ngado e kudo që shkon, një pjesë e jotja i përket e publikut, çka është gjë e mirë. Por nga ana tjetër, kjo do të thotë që s’ke më kohë për veten. Kështu, mendova që duke rikarikuar bateritë do të isha plotësisht i aftë të rikthehesha një ditë dhe ja ku jam. Aktualisht po punoj për një album. Po ju them që do të jetë më i suksesshëm se albumi im i parë me këngët hit “Darkman”, “Lonley”, e të gjitha ato që ju i keni dëgjuar… Po punoj me disa këngëtarë mes të cilëve Dr. Alban, i cili do të jetë pjesë e këtij albumi të ri që do të dalë së shpejti, e po ashtu shqiptarët do të kenë një surprizë, – të cilën më vjen keq por s’mund t’ua zbuloj që tani, – duke bashkëpunuar me një këngëtar shqiptar, pasi jemi ende duke punuar për fazën përfundimtare, në atë të lidhjes së kontratave…”.
Nana duke interpretuar disa nga hitet e tij te njohura per publikun shqiptar. Foto: Edmond Prifti/ATSH

Nana duke interpretuar disa nga hitet e tij te njohura per publikun shqiptar. Foto: Edmond Prifti/ATSH

Le të kthehemi paksa edhe tek bashkëpunimet tuaja. Dikur së bashku me reperin e njëherazi producentin tuaj të parë Tony Cottura, u bëtë i famshëm. Bashkëpunoni ende? “Në këtë album mbase, por ende se kam përfunduar. Deri tani nuk kam bashkëpunuar me të, por e sigurtë që do të regjistroj një nga pjesët e këtij albumi, por vijoj të kem producent Bülent Aris, me të cilin kam realizuar 4-5 këngët e para. Ju premtoj që ky album do të jetë diçka tejet e bukur…”.

Le të flasim për Shqipërinë. Çfarë mitesh apo njohjesh keni pasur me Shqipërinë? Është hera e parë këtu apo…e keni përfshirë më parë Shqipërinë në ato udhëtime turistike që thatë edhe më sipër? “Jo. Është hera e parë qe vij në vendin tuaj. Kam shumë miq shqiptarë në Gjermani, ku edhe jetoj, e janë vërtet njerëz të mirë…shumë të mirë. Jam shumë i lumtur që ndodhem këtu madje edhe për këtë arsye”.

Cila ishte përshtypja e parë kur zbritët në “Nënë Tereza”? “Ok, po ta them pa ekuivok. Kur lashë aeroportin pas dy gjëra më ranë në sy. E para. Vendi juaj është tejet i bukur!”. Këtë ju e patë nga avioni? “Jo, po flas kur e preka tokën me këmbët e mia, në çastin kur hipa në makinë. Malet janë një miks mediteran e diçka nga Rumania apo Bullgaria.. Është vërtetë një vend i bukur, nga ajo çka më zunë sytë përqark dhe e dyta… shikova kudo shumë meshkuj! Më shumë se 95 % meshkuj rrugëve e po pyesja veten: A ka femra ky vend? A mund të më thoni se ku janë…Ok, mbase e gjej vetë! Janë në shtëpi, apo mbase duhet të jenë në shtëpi?”.

Në se thoni këtë gjë duke qenë beqar, atëherë do të thotë që nuk njihni asnjë shqiptare femër në Gjermani? “Hmmm veçse meshkuj. Gangsterë mund të them… e respekt për ta”. Pra, ta kuptojmë “njerëz të sherreve”? “Jo”, thotë Nana duke qeshur “…biznesmenë, e madje tejet të aftë”. Çfarë patë në detaje në këto 5-6 orë të lira para koncertit të mbrëmjes së sotme në “Dream City”? “Pashë një pjesë të kësaj qendre të Tiranës si dhe hëngra një darkë të këndshme me peshk të freskët, këtu shumë afër kësaj zone që mësova se quhet Blloku (të cilën pas intervistës do ma shpjegosh për se e do më thuash edhe disa fjalë në shqip…).

Kengetari Nana Foto Edmond Prifti 1Do të kthehesh sërish në Shqipëri? “Ndoshta do të kthehem sërish në verë në Shqipëri, e atëherë do të interpretoj për shqiptarët 3-4 këngë nga albumi im i ri, duke përfshirë edhe “All good males”, por deri atëherë ju do të jeni të parët që do t’ju informoj”. Më tej, Nana na tregon diçka që kishte regjistruar nga telefoni i tij iPhone, nga miqtë e tij shqiptarë, ndërsa vetë përsëriste të njëjtat fjalë “Të dua Shqipëri”, “Të dua Tirana”, “Ju dua shumë”. Më tej, koncerti i këngëtarit Nana “u zhvendos” në dalje të Tiranës, ndërsa këngëtari hipi në skenën e menaxhuar rreth orës 02.00 pas mesnate, duke kënduar disa nga hitet e tij si “Darkman”, “Dreams”, “Remember the time”, “Lost in my life”… Ndërsa afro 2000 të rinjtë e pranishëm në diskotekën e mbushur plot, kënduan njëzëri këngën e tij të preferuar nga të gjithë, “Lonley”.
Nana

Këngëtari Nana, me emrin e tij origjinal Nana Kwame Abrokwa ka lindur më 5 tetor 1969 në Accra të Ganës. E ëma së bashku me vëllezërit dhe motrat e tij, transferohen në Hamburg të Gjermanisë kur Nana ishte veçse 10-vjeç. Para se të fillonte karrierën muzikore si DJ nën pseudonimin Nana apo Darkman, në klubet e hip-hop-it, ku edhe njihet me bashkë-producentin DJ David Fascher, ai interpreton në dy filma gjermanë.

Në mesin e viteve ’90, vijnë edhe sukseset e tij ndërkombëtare, të një stili të karakterizuar si “euro-rap”. Në 1995, ai bashkëpunon me producentët Bulent Aris dhe Toni Cottura (Producent i “N’Sync” dhe “The Backstreet Boys”) për këngën “Dreams”, e cila bëhet shumë shpejt një hit ndërkombëtar. Ndërsa Aris dhe Cottura hapin Shtëpinë Dioskografike “Booya Music” në 1996, Nana ishte këngëtari i parë që i bashkëngjitet, ndërkohë që kënga “Dreams” arrin në top-hit 10 në Gjermani, dhe  “Lonley” bëhet euro-rap numër një për disa javë.

Albumi i parë “Nana” del në vitin 1997, duke konkurruar edhe artistë të njohur ndërkombëtarë të repit amerikan. Albumi i dytë “Father” publikohet në Maj të vitit 1998 e mban disa pjesë të lehta si “Too much heaven” apo “War”. Në fund të vitit 1999, Nana realizon këngën “I wanna fly” e cila e ngre edhe njëherë në krye të klasifikimeve evropiane, euro-rap-in. Në fillim të viteve 2001, Nana realizon një këngë gjermane “Du wirst sehen”, por kënga nuk u pëlqye nga fansat ndërkombëtarë.

Pas një shkëputje të gjatë, Nana realizon në verën e vitit 2004 albumin “All doors in flight Nr. 7”, në bashkëpunim me Jan va nder Toorn dhe Manuell, në studion tashmë private të tij, “Darkman Records”, album i cili u shpërnda ekskluzivisht veçse në Internet apo në faqen e tij personale. Kënga e tij “Lonley” e vitit 1997, është vlerësuar me Disk Ari në Amerikë dhe Disk Ari dhe Platini, në Gjermani. Po ashtu, Disk Ari ka fituar edhe me këngët e tij “He’s comin’”, “Too much heaven” dhe “Remember the time”. Në 1997, ai rrëmben çmimin si “Debutimi më i mirë gjerman” si dhe 3 çmime më 1998 nga ECHO (2 herë) si “Debutimi gjerman më i suksesshëm” dhe nga Comet Award si “Best German Act”.